Almennt um búnað (hin heilaga þrenning)
Réttur búnaður ferðalanga á fjöllum að vetrarlagi
getur skipt sköpum ef einhverjir þeirra lenda í óhöppum eins og snjóflóðum.
Það skiptir miklu máli hverslags ferðalög er verið að fara
í. Spurningin er hvort búnaðurinn þarf að vera léttur eða hvort
hann má vera svolítið efnismeiri og þyngri og þar með yfirleitt
sterkari.
Ekki þarf að hugsa um þyngd snjóflóðaýla í þessu samhengi en nokkur munur
getur verið á þyngd snjóflóðaleitarstanga og snjóskófla.
Léttur búnaður
Í löngum gönguferðum með bakpoka er nauðsynlegt að hafa
þyngd búnaðar í huga. Ýlir er bornir innan klæða, þ.e. undir yfirhöfn
eða í buxnavasa með rennilás, en snjóflóðaleitarstöng og snjóskófla eru höfð
í bakpoka með öðrum búnaði. Skóflur eru þá oft úr plasti og frekar
litlar en stangir úr áli og oft ekki nema um 2-3 m á lengd.
Þyngri og öflugri búnaður
Þeir sem ferðast að mestu leiti á farartækjum og/eða ganga
aðeins stuttar vegalendir með bakpoka með öryggisbúnaði í ættu að velja
búnað sem er sterkari en sá búnaður er sem rætt er um hér að ofan.
Þessi búnaður er yfirleitt nokkuð þyngri sérstaklega snjóskóflan.
Svona búnaður gæti hentað ágætlega þeim sem aka um á snjósleðum eða bílum
t.d. starfsmönnum Vegagerðarinnar, veitufyrirtækja og lögreglu.
Þetta á einnig við snjósleðaflokka björgunarsveitanna og aðra frístunda
snjósleðamenn.
Það er mikilvægt
að búnaðurinn sé í bakpoka á hverjum einstaklingi sem er á snjósleða
því lendi hann í snjóflóði og missi við það sleðann þá er lítið gagn í
búnaði sem er á sleðanum undir snjóflóði!
Ástæða þess að
menn ættu ekki að bera snjóflóðaleitarstangir og skóflur utan á bakpoka er
sú að þessir hlutir geta slegist í höfuð manna og skaðað þá, ef þeir
kútveltast í snjóflóði.
Myndin sýnir hina Heilögu þrenningu sem allir
fjallamenn ættu að hafa á ferðalögum. Álskóflan á myndinni er frekar í
þyngri kantinum og er með framlengingu sem er inni í skaftinu en
snjóflóðaleitarstöngin er létt og er úr 40 cm einingum og er 3,2 m á lengd.
Innan tíðar koma upplýsingar um snjóflóðastangir.